自問唔係一個好識得維繫長時間關係嘅人，因為我實在太跳太怕悶，冇大冇細，前幾日撞到個好耐冇見嘅前輩，我...

自問唔係一個好識得維繫長時間關係嘅人，因為我實在太跳太怕悶，冇大冇細，前幾日撞到個好耐冇見嘅前輩，我已經係亂咁噏晒咁耐冇見嘅嘢跟住走咗去😂任何撞入我生命嘅人同事，我嘅熱情濃度好高，但時間可能係好短。舉個例講，你响街撞到我，你問我最近點呀？我就會開始講啲超認真關於最近點嘅嘢，其實你都未必想知。但呢個世界要有人想知先講得嘅咩？唔可以因為我想講嘅咩？然後你可能覺得我咩料呀寒暄下啫。但我冇寒暄模式，我一定係講嗰刻我最想同你講嘅嘢，甚至有時根本係直搗黃龍嘅對話，唔會啱聽，但好想講，同埋覺得大家夠成熟咪會take，唔成熟就當我痴線啦。然後我發現我依然係有好多朋友，人生真美好。有時會諗，我死咗之後，如果要寫弔唁冊，你會點寫我呢😆

深夜，拆緊人哋送過嚟嘅禮物，睇緊自己有冇啲message係未好好回覆。

感覺到我咁樣做人都有咁多人對我好，好好彩☺️

我嘅生命豐盛來自我懶到攤响度迎接各種形式嘅豐盛。

嚟啦！嚟淹沒我啦！

This is how you talk to the universe.

With love, Mali

---